Jan 20, 2020 ah Buainak a chuak lai maw?

 

A lai mi cacawn nithumni cu vawlei pi nih kan cuanh dihmi ni ah a hun i chuah. Zeidah a cang khawh timi tete le thil um kal ning tawi te in a caan lio te ah zoh tuah u sih. Biahal nak le bia leh nak bantuk in kan zoh lai. Jan 20, 2020 cu president thar Joe Biden nih rian tuan hram a thawk ding ni a si.

zei ruang ah dah National guard 25,000 white house ah an kal?

National guard hi rampi humhimnak caah white house runven ding ah a kal mi an si. President nih martial law hman a duh caah timh lamh mi asi lo. National guard hi state ralkap an si i federal nih a herh nak poh ah ramchung he ram leng he hman khawh mi ralkap an si. An mah denfense department hrimhrim nih US phunghram pi kan zulh lai tiah thawng an thanh cang.

Trump a tanh tu Mipi pawl tah buainak tuah an i tim maw?

Trumh a tanhtu pawl nih Jan 06, 2020 ah capital an luh hnawh i minung panga nunnak tiang a liam caah Facebook le twitter nih President trump account an thah piak i, a mah a tanhtu mitampi zong an block hna caah Trump a tanhtu pawl mitampi cu parlar timi social media ah ani thial i ca tha lo tampi an post caah Apple, Amazon le google nih an app store in Parlar cu an phih chung. Cucaah Telegram le MeWe timi social media ah Trump a tanh tu pawl hi i thial than dawh an si. thla ni 6 buainak hnu in zarhkhat chung ah US minung 1.2 million nih telegram an dawnload i, 829,000 nih MeWe an download. MeWe bia chimnak nawl ngei tu David Westreich nih :"ruah lo piin MeWe a hmang tu a karh tuk hlei ah group thar zong a tam ngainagi i ramkhel kong an ceih ngai" tiah a ti. Ca tha lo le buainak tuah ding in thazaang peknak ca a tialmi micheu khat zong FBI nih zung ah auh in le inn ah fuh in bia an hal mi tete zong an um pah. Cucaah a fiang bikmi cu buainak cu tuah an i zuam ko nain an tuah khawh lai maw tuah khawh lo ti lawng hi a tang mi cu asi.

Facebook, Apple, Google, Twitter le Amazon nih hi bantukin thil an tuah hi a herh maw?

Hibantuk in Trump tel in mi tampi le App cheu khat an phih hna ruang ah an tang ka lut tamtuk a zor caah an stock zong cei lak a tla. Cucu a cang lai ti zong an theih ko buin hi ti’n thil an tuah hi rampi an dawt ca le phunghram an upat caah a si. Hihi US an lungput a pical nak le Upat an tlaknak asi. Kan nih Asian lei sisehlaw caan tha ah i lakin meiphu ah datsi an tawih lai i tangka tam pi an rut lai. Hi thil an tuahmi nih hin buainak tuah aa timtu mitam pi a kham hna hlei ah khuazong a ruah ter hna lai. US ah hin Mirum le Mifim nih thil an tuahmi hi mi lungthin ah bia a chim ngaingai caah Rampi a himnak dingah a herh tukmi le an rian a si mi tlamtling tei’n an tuah asi.

Trump nih Ralkap kutah Uknak a pe lai maw?

Hi bia halnak hi US mi caah cun leh hau lo a sinain kan nih kawlrammi caah cun Ralkap tang ah a thang mi kan si caah tawi ten tial u sih. Ralkap uk nak cu martial law an ti. ram pakhat martial law ah a tlak tawn nak cu, ralkap nih uknak lak an duh i an thazaang a thawn fawn ah cun pek law law an hau. A siloah ram leng he i tuknak maw, ramchung buainak maw faktuk in a chuah i hruaitu an um lo ah cun ralkap nih an tleih a hau. A tu lio US dirhmun ah cun Phungning tein hruaitu an thim khawh cang, Ralkap nih kan phung hram kan dir kamh tiah thawng an thanh cang, Trump hnathlaknak in runvennak zong tlamtling tein timhlamh a si cang caah Ralkap ah uknak a pe lai lo tiah chim khawh a si.

Trump hi President in an phuak lai maw, zei ruangah dah phuah an timh bik?

A fawinak in an phuak khawh lai lo.

1.      A caan a um ti lo. President in chuah dingah cun House nih an ceih i an pass a hau. Cu hnuah senate nih an ceih ve i an pass ve a hau, Nikhat ni zungkhar a si nihnih ni lawng caan a um caah an tuah khawh lai lo.

2.      A caan um hmanhseh law an phuak khawh lai lo; president in phuah khawhnak dingah tam deuh hna thlaknak men in lak a si lo. congress cheu thum cheu hnih nih an hna a thlak lawng ah phuah khawh a si. Repulican minung 10 nih phuah ding in an hna a tla nain cheu thum cheu hnih tlin nak ding ah cun an i hlat tuk rih .

A tu tan impeachment an tuah nak a ruang bik cu Jan 06, 2020 buainak kha a mah nih thazaang a pek hna caah a chuak mi asi an ti. Buainak an tuah lai te ah khan President Trump nih buainak a tuah tu mipi kha a va ton hna i thazaang a va pek hna.

Trump nih buainak tuah aa tim maw?

Catial tu keimah hi mi cheu nih Biden a tanh tu ah an ka ruah. A ho hmanh ka tanh hna lo. Asinain Trump riantuan nak ah bamwhnak tlawm tete ka pek tawn caah trump supporter list ah ka um. President trump nih a mah a tanh tu pawl statement a kan kuat mi ah “in light of reports of more demonstrations, I urge that there must be no violence, No lawbreaking, and NO vandalism of any kind. That is not what I stand for, and it is not what America stands for. I call All Americans to help ease tensions and calm tempers. Thank you” tiah a ho hmanhnih buainak tuah lo dingin le phung buar lo ding in a tial. Cu caah President Trump zong nih buainak tuah aa tim lo tiah ti khawh asi.

Zei tin dah kan um lai?

State kip ah buainak a chuak khawhmi dir hmun ah kan um caah lengchuah le umkal I ral rin ah a tha. Thinphan le thlalau in um lo ding a si lai. Uk tu le nawl ngei tu zong hi Pathian hna thlak nakin a tlingmi an si caah a ho an tlin poh ah kan cohlan thaim le thla kan cam piak hna a herh. Cucu zumtu kan rian a si. A zia kan theihrih lo mi le a sual le a that kan hmuh bal rih lo mi hna ruahnak in doh rumro kha kan hrial a hau. US president cu vawlei pi president bantuk an si caah US ca lawng si lo in vawlei pi huap in president a tuan kho tu Joe Biden si hram seh tiah thla za cam piak cio hna u sih.